Pitturi fis-Santwarju ddedikat lill-Verġni Marija, il-Mellieħa : selezzjoni ta’ pitturi

Abstract

Is-Santwarju ddedikat lill-Verġni Marija fil-Mellieħa għandu storja twila, waħda li tmur lura, ta’ mill-inqas, seba’ sekli, u li taf il-bidu tagħha minn għar fqajjar mibdul fi knisja. Mill-bosta knejjes imħaffrin millblat li hawn imxerrdin madwar il-pajsaġġ Malti u li għandhom oriġini Sikulo-Biżantin, l-eqdem u l-iktar waħda importanti hi s-Santwarju tal-Mellieħa li sallum għad għandha sinifikat devozzjonali notevoli. Din hija l-unika knisja mħaffra mill-blat li għad għandha l-immaġni kulta tagħha mpittra fuq wiċċ l-irdum. Ilpajsaġġ b’ħafna għoljiet tal-Mellieħa kien sit sinifikanti fil-perjodu ta’ wara l-Musulmani, jiġifieri fil-Medju Evu Tardiv f ’Malta. Il-Mellieħa kien villaġġ remot li kien maqtugħ sew mill-bqija tal-gżira u għalhekk kien jeħtieġ li jkun hemm ċentri ta’ qima għan-nies li kienu jgħixu fl-inħawi waqt il-perjodu ta’ kristjanizzazzjoni mill-ġdid tal-gżejjer Maltin f ’dan iż-żmien. Huwa minn dan il-kuntest li l-eqdem postijiet ta’ qima fil-Mellieħa, jiġifieri s-Santwarju ddedikat lill- Verġni Marija u l-kumpless ta’ għerien ta’ San Niklaw oriġinaw għall-ewwel bħala kumplessi fqajra li kienu pjuttost vernakulari.3 Is-Santwarju sar iktar popolari bil-wasla tal-Kavallieri tal-Ordni ta’ San Ġwann fl- 1530, filwaqt li l-għerien ta’ San Niklaw, li kienu iktar diffiċli biex wieħed jasal għalihom, tħallew fil-biċċa l-kbira fl-istat naturali tagħhom. [Silta]