Il-ħolqien ta' pakkett ta' riżorsi għas-sillabu l-ġdid tal-livell taċ-Ċertifikat tal-Edukazzjoni Sekondarja : il-poeżiji ta' Dun Karm u r-rumanzi

Abstract

Din it-teżi tiffoka fuq il-ħolqien ta’ pakkett tar-riżorsi għat-tagħlim tal-letteratura tas-sekondarja speċifikament għaż-żewġ taqsimiet tal-letteratura: il-poeżiji ta’ Dun Karm u s-siltiet mir-rumanzi, sabiex isservi ta’ għajnuna għall-għalliema bħala għodda edukattiva għall-istudenti li se jagħtu l-eżami tal-Malti fil-livell taċ-Ċertifikat tal-Edukazzjoni Sekondarja (ĊES) mis-sena 2025. Ir-riżorsi magħmulin bil-ħsieb li jimmotivaw lill-istudenti, iħeġġuhom iħobbu aktar ’l ilsienna u jiżviluppaw funzjonijiet mentali ogħla billi l-letteratura tinbidel f’esperjenza personali li tagħnihom bħala bnedmin. Għalhekk huwa maħsub li dawn ir-riżorsi jittellgħu fuq is-sit uffiċjali tad-Dipartiment tal-Malti fi ħdan id-Direttorat tal-Kurrikulu u l-Assessjar biex hekk ikunu aċċessibbli kemm għall-għalliema kif ukoll għall-istudenti. Sabiex jinħolqu riżorsi utli ġiet mistħarrġa letteratura li titkellem dwar it-tagħlim b’mod ġenerali, it-tagħlim talletteratura, it-tagħlim permezz tar-riżorsi u t-tagħlim relatat mas-sillabu l-ġdid taċ-ĊES li dawn ilkoll kienu ta’ gwida għall-ħolqien tar-riżorsi. Il-pakkett tar-riżorsi jinkludi sbatax-il riżorsa; riżorsa għall-ħmistax-il test misjub fiż-żewġ taqsimiet tal-letteratura u waħda għal kull taqsima bħala reviżjoni. Ir-riżorsi ppreżentati huma varjati u jinkludu kemm riżorsi tradizzjonali bħal leħħiet u karti tat-taħriġ, kif ukoll riżorsi diġitali bħal logħob diġitali u preżentazzjonijiet. Barra minn hekk ir-riżorsi huma mħejjija għall-ogħla livell tal-kwalifika tal-Qafas Malti tal-Kwalifiki (QMK) u kull waħda tiffoka fuq kisba partikolari.