Crux Invicta : il-Kurċifiss Mirakuluż u l-Kapuċċini f'Għawdex

Abstract

L-idea ta’ dan il-ktieb nibtet wara r-restawr li sar fl-2017 fuq il-Kurċifiss Mirakuluż li hu meqjum fil-knisja tal-Kapuċċini ddedikata lill-Madonna tal-Grazzja fir- Rabat t’Għawdex. Għall-bidu ħsibt li nikteb artiklu qasir fuq din ix-xbieha qaddisa, imma aktar ma bdejt infittex, iżjed bdejt niskopri li wara dan il-Kurċifiss hemm storja interessanti u devozzjoni qawwija li ntrabtet mhux biss mal-kunvent u l-knisja ta’ dawn il-patrijiet, imma wkoll ma’ Għawdex. Il-preżenza ta’ dan il-Kurċifiss Mirakuluż għand dawn il-patrijiet tmur lura għaż-żmien meta kienu għadhom qed jibnu l-kunvent tagħhom f’din il-gżira. F’kelma oħra, din ix-xbieha qaddisa akkumpanjat lill-Kapuċċini sa mill-ewwel snin li fihom huma stabilixxew ruħhom hemmhekk. Min-naħa tagħhom, l-imsemmija patrijiet ma baqgħux lura milli jippromwovu d-devozzjoni lejn il-Kurċifiss Mirakuluż – kif baqa’ magħruf f’Għawdex.