Patri Donat Spiteri : qaddej tal-Kelma ta’ Alla

Abstract

F’dan il-ktieb prezzjuż li jagħti ġieħ lil Patri Donat Spiteri, wieħed jara eżempju ċar tal-ispirtu Franġiskan li janima l-komunità tal-Kapuċċini, għaliex b’din il-pubblikazzjoni Fr Martin Micallef qiegħed jgħolli lil wieħed minn ħutu fi spirtu ta’ mħabba u rispett komunitarju. Hija għalhekk xi ħaġa tassew xierqa u nobbli li l-ħajja ta’ dan is-saċerdot Kapuċċin, Biblista renomat, ġiet studjata bir-reqqa biex dak li kien moħbi jinkixef (ara Lq 8:17), u biex il-bnedmin jaraw il-ħajja u l-għemejjel tajba ta’ Patri Donat u jagħtu glorja lil Alla fis-sema (Mt 5:16). Huwa u jfittex it-traċċi kollha possibbli fl-istorja ta’ ħajjet Patri Donat, l-awtur għamel l-investigazzjoni tiegħu mhux b’mod pietuż, iżda bir-reqqa u bl-attenzjoni sħiħa li jikkaratterizzaw il-kitba kollha tiegħu. Fr Martin, li huwa espert fl-istudji xjentifiċi tal-Iskrittura, hawnhekk fittex li jixtarr mhux xi manuskritt antik tal-Kelma ta’ Alla, iżda pjuttost kif dik il-Kelma ħajja ħadet sura tanġibbli fil-ħajja ta’ saċerdot eżemplari. [Silta mid-Daħla]