Il-ġurnaliżmu u l-ġlieda għall-vot tal-mara Maltija fil-kuntest imperjali : l-irwol ta’ Mabel Strickland

Abstract

Dan il-kapitlu jħares lejn il-kuntest li fih ħadmet Mabel Strickland fl-ewwel snin tal-ħajja tagħha fil-politika. Is-sena 1931, kienet sena deċiżiva f’ħajjitha, fejn intensifikat il-ħidma politika tagħha u ressqet petizzjoni iffirmata minn 428 mara Maltija biex tinbidel il-Kostituzzjoni sabiex in-nisa jiksbu jeddijiet politiċi. Minkejja li Mabel kienet deskritta bħala ‘animal politiku’ u l-id il-leminija ta’ missierha Lord Gerald Strickland, li f’dan iż-żmien kien Prim Ministru u mexxej tal-Partit Kostituzzjonali, hija sabet ħajt ma’ wiċċha . Kien il-ġeneru tagħha li aktarx żammha milli tipprova tiret it-tmun tal-Partit Kostituzzjonali, dak il-partit li hi stess kienet għenet biex jitwaqqaf, għaliex kienet mxekkla minn Kostituzzjoni li ma kienetx tippermetti lin-nisa jivvotaw u jikkontestaw l-elezzjoni . Iżda ma kien hemm ebda xkiel Kostituzzjonali għal din il-mara biex tuża l-ġurnaliżmu biex tipprova tilħaq l-għanijiet politiċi tagħha.