L-istruttura u l-uffiċjali tal-fraternità - skeda 10

Abstract

“Ħadd ma jqiegħed l-inbid il-ġdid f’damiġġani qodma tal-ġild, għax inkella l-inbid jifqa’ d-damiġġani, u jintilef kemm l-inbid u kemm id-damiġġani. Iżda nbid ġdid jitqiegħed f’damiġġani ġodda!” (Mk 9:14-17). Dan il-kliem ta’ Ġesù minbarra li min-naħa l-waħda jurina l-ħtieġa tat-tiġdid fil-forom li fihom inżommu tajjeb l-inbid tal-fidi, min-naħa l-oħra wkoll jitfgħalna dawl fuq il-verità li mingħajr strutturi f’posthom u b’saħħithom l-inbid it-tajjeb jinsab fil-periklu li jintilef. Għaldaqstant huwa meħtieġ li f’kollox, il-valuri tagħna, inħarsuhom permezz ta’ strutturi adatti, bħalma ħwejjeġ li jiswew nerfgħuhom f’posthom u mkejjen adatti sabiex ma jitnawrux u ma jitħassrux. Ġesù drabi oħra jġib l-eżempju tat-teżor tal-qalb li importanti jitqiegħed “fejn xejn ma jitmermer u la bil-kamla u lanqas bis-sadid, u fejn ma hemmx ħallelin jinfdu u jisirqu.” (ara Mt 6:19-23). Jekk dan jgħodd għall-ħwejjeġ materjali kemm aktar jgħodd għall-ħwejjeġ tar-ruħ!