Il-Carmelite Institute Malta

Abstract

Is-sena 2018 timmarka l-għaxar snin mit-twaqqif tal-Carmelite Institute Malta (CIM) fl-2008, bil-ħidma u l-viżjoni tal-Provinċjal P. Alexander Vella, mill-Provinċja Karmelitana Maltija u l-Provinċja Maltija tal-Karmelitani Skalzi, bl-għan li joffri formazzjoni fl-Ispiritwalità permezz ta’ korsijiet u riċerka. B’kollaborazzjoni mal-Fakultà tat-Teoloġija fl-Università ta’ Malta, dan l-Istitut jagħti sehmu fil-programm tal-Masters għall-istudju tal-Ispiritwalità Karmelitana. Il-Programm tal-Masters fetaħ ukoll fl-2008. CIM jaħdem ukoll f’kollaborazzjoni mal-Pastoral Formation Institute u ma’ diversi Istituti oħra Karmelitani ta’ Spiritwalità madwar id-dinja. L-għan ewlieni ta’ CIM huwa li joħloq spazju fejn il-persuni jistgħu jirriflettu dwar ir-relazzjoni tagħhom ma’ Alla permezz tal-istudju tal-awturi u t-testi l-kbar tal-ħajja spiritwali. Is-sede tal-Istitut tinsab fil-Kunvent tal-Karmnu fl-Imdina, fejn hemm ukoll bibljoteka u arkivju speċjalizzati l-iktar fl-Istorja u l-Ispiritwalità Karmelitana. Mis-sena 2017 l-Istitut Karmelitan kompla jitmexxa mill-Provinċja Karmelitana Maltija.