Il-Verġni Mqaddsa Marija fil-ħajja u t-tagħlim ta' S. Marija Maddalena de' Pazzi

Abstract

Fis-7 ta' Settembru 1590, lejlet il-Bambina, Santa Marija Maddalena de' Pazzi, mitlufa f'estażi tara r-ruħ ta' ommha Marija di Lorenzo Buondelmonti, fis-sema, sabiħa ħdejn il-Verġni Marija. Skont il-qaddisa ommha, kellha l-grazzja fis-sema toqgħod ħdejn il-Verġni Marija, mhux biss għax kien jisimha għaliha u kellha devozzjoni kbira lejn il-Madonna, imma wkoll għax kull fejn tmur kienet twaqqaf Fratellanzi tar-Rużarju. Mingħand ommha tgħallmet din id-devozzjoni tar-rużarju u bħalha, il-qaddisa kienet sa minn ċkunitha tgħallem lill-fqar u lill-illitterati fil-fidi t-talba tas-Sliema u l-Qaddisa flimkien mal-katekiżmu. Il-preżenza ta' Marija f'ħajjitha kienet waħda importanti u mhux b'kumbinazzjoni li l-Ewwel Tqarbina rċevietha wkoll nhar il-25 ta' Marzu 1576, festa tal-lunzjata. Bħal f'Marija, dakinhar, il-Verb ta' Alla ngħaqad fi żwieġ mistiku ma' Caterina de' Pazzi (kif kien jisimha l-qaddisa qabel saret Karmelitana). Mhux ta' xejn lanqas li isimha bħala reliġjuża kien Maddalena del Verbo Incarnato, jiġifieri, "Maddalena tal-Kelma li saret Bniedem".