Fili : Ir-Romantiċiżmu modern tal-Moderni

Abstract

Fid-diskors kritiku dwar l-istorja letterarja f'Malta, hemm it-tendenza li tinħoloq bħal fruntiera wiesgħa ħafna bejn l-era Romantika (għall-konvenjenza ddatata bejn il-bidu tas-seklu għoxrin u s-sittinijiet ta' l-istess seklu) u l-era magħrufa bħala Moderna, jew is-snin tal-Moviment Modern (iddatat mis-snin sittin sa żmien li għadu mhuwiex identifikat). Din il-fruntiera x' aktarx illi tidher bħala speċi ta' gandott fond illi jifred għal kollox naħa minn oħra. Tradizzjonalment, id-diskors kollu li jittratta d-differenzi bejn iż-żewġ eri, stinka bil-qawwa kollha biex joffri biżżejjed argumenti ħalli dawn iż-żewġ movimenti jibqgħu jidhru mhux biss distinti, iżda aktar minn hekk, opposti għal xulxin. Donnu li l-atteġġjament ċentrali fejn tidħol l-istorja tal-letteratura f'Malta, kien tali li jħares lejn il-Moderniżmu bħala l-antitesi tar-Romantiċiżmu, b'xi kummentaturi jħarsu lejn poeti bħal Rużar Briffa, Karmenu Vassallo u anki Marjanu Vella bħala s-sintesi ta' din id-dikotomija. [silta mill-artiklu]