San Ċirillu u San Metodju

Abstract

Tkun ħaġa nobli jekk kull 14 ta’ Frar mhux biss niccelebraw Jum San Valentinu, kif donna tħeġġiġna l-kultura tagħna, iżda ukoll infakkru żewġ qaddisin kbar u ko-patruni ta’ l-Ewropa: San Ċirillu u San Metodju. Permezz ta’ ittra enċiċlika imsejjħa “Slavorum Apostoli” promulgata fit-2 ta’ Ġunju 1985, il-mibki Papa Gwanni Pawlu II mhux biss xtaqt ifakkar u jxandar ħidmet dawn iż-żewg aħwa missjunarji, iżda ħeġġeġ lil kulħadd sabiex jgħozz ‘l dawn il-ġganti ta’ l-istorja tal-Knisja u ta’ l-Ewropa. Dawn ġew imsejjħa mill-imperatur Bizantin u Patrijarka ta’ Kostantinopli, fuq talba tal-Prinċep Ratislav, sabiex imorru fil-Moravia l-Kbira u hemmhekk ixerrdu l-vera fidi nisranija bi lsien Slav. Għaldaqtsant, huma telqu art twelidhom u ħadu magħhom l-Iskrittura u xi kotba oħra liturġiċi li aktar tard ittraduċew għal-lingwa antika Slava. Aktar tard, ddeċidew li jiktbu kollox b’alfabet ġdid. Ċirillu u Metodju jibqgħu msemmija għar-rispett lejn id-diversità tal-kulturi, kif ukoll għall-ħila li eżerċitaw biex jintegraw il-fidi mal-kultura tal-post. Bla dubju, ibbenefikaw minn frott ħidmiethom il-Knisja, il-poplu Slav u l-kultura ewropeja.