Fuq fuq... dwar bidu ta' prattiċi forensiċi f'Malta

Abstract

Dan l-artiklu jirrakkonta l-istorja tax-xjenza forensika f'Malta fl-investigazzjoni kriminali. L-ewwel inidkazzjoni ta' prattiċi forensiċi fi ħdan il-Korp tal-Pulizija jmur lura fl-1931. Dak iż-żmien, id-Deputat Kummissarju kien ta struzzjonijiet permezz ta' ċirkulari sabiex meta waqt investigazzjoni jiġu nnotati marki tas-swaba' fil-post tad-delitt, għandhom jinfurmaw u jindikawhom lil Criminal Investigation Department. L-ewwel laboratorju forensiku kien twaqqaf mill-Gvern fis-snin ħamsin. Meta fl-1955 kien seħħ il-qtil ta' Toninu Aquilina b'arma awtomatika, il-perit Dom Mintoff kien talab lil Scotland Yard biex jgħinu fl-investigazzjoni għax il-pulizija ta' Malta ma kienux attrezzati u mħarrġa biex issolvi każijiet kriminali ta' din ix-xeħta. Wara li ssolva l-każ u nħasset il-ħtieġa li l-pulizija ta' Malta tkun kapaċi tinvestiga każijiet bħal dawn, bdew jintbatu membri tal-korp għat-taħriġ l-Ingilterra, u hekk bdiet l-istorja tal-forensika fi ħdan il-Pulizija ta' Malta.