Il-Bibbja : għajn ta’ talb

Abstract

Il-Bibbja hija għajn ħajja ta’ talb. Bħall-profeta Iżaija issejħilna: “Ejjew intom ilkoll li bikom il-għatx, ejjew għall-ilma” (Iż 55: 1). Aħna bil-għatx biex nitolbu, bil-għatx biex nisimgħu u niġu mismugħa minn Alla tagħna li huwa mħabba. Dan il-għatx naqtgħuh bl-Iskrittura. Jekk naqraw il-Bibbja kuljum insibu għajnuna kbira għall-ħajja ta’ talb mibnija fis-sod, ħajja ta’ talb mibnija fuq relazzjoni intima ma’ Alla. Hija relazzjoni li tgħinna nidħlu xi ftit fil-misteru tal-kobor t’Alla. Kobor li jdawwalna u jurina dak li verament aħna: ċkejnin, midinbin u fi bżonn kbir tiegħU. Nistgħu b’hekk nagħmlu esperjenza tas-sliem, il-ferħ, il-barka u s-salvazzjoni li Alla joffrielna. Nikbru fil-għarfien ta’ l-imħabba tremenda li biha Alla jħobbna, l-interess u l-kura tiegħU. Nitgħallmu nersqu lejn Alla bil-fiduċja u bl-imħabba.