Cognomentum familiae : l-iskrutinju tal-kunjomijiet fil-lexicon ta’ Vassalli

Abstract

Kemm-il darba jixref l-argument li l-kunjomijiet, bħan-nomi proprji kollha, jokkupaw pożizzjoni relattivament marġinali fis-sistema tal-lingwa. Ħafna drabi jitqiesu bħala kategorija primittiva ta’ kliem li jipprovdu sempliċi tikketta ta’ referenza. Din l-idea preġudikata hija aktarx konnessa mal-ħsieb li n-nomi proprji, f’kuntrast man-nomi komuni, ma jħaddnux tifsir kunċettwali. Il-kunjomijiet għal żmien twil kienu jitqiesu bħala kreazzjonijiet immaġinattivi, imsejsa fuq speċi ta’ drawwa ritwalistika qadima. Fir-realtà, kull kunjom għandu tifsira – anki jekk mhux dejjem dik apparenti. Kull kunjom jista’ jiġi razzjonalizzat u kklassifikat. Illessikografi damu ftit mhux ħażin biex fehmu dan. F’dan il-kuntest wieħed għandu japprezza aktar il-kontribut bikri, imma importanti, ta’ Mikiel Anton Vassalli fil-qasam tal-onomastika, ix-xjenza li tgħarbel l-oriġini u n-nisel tal-ismijiet proprji. L-iskrutinju tal-kunjomijiet sewwasew jaqa’ fl-ambitu tal-antroponomastika, l-istudju tal-ismijiet tan-nies li jinkludu wkoll l-ismjiet personali u l-laqmijiet. Irridu napprezzaw il-fatt li fi żmienna kemm Ġużè Aquilina kif ukoll Erin Serracino-Inglott taw lill-kunjomijiet l-importanza li tixirqilhom fid-dizzjunarji tagħhom.