Storja tal-ilsien u l-letteratura Maltija : kronoloġija

Abstract

L-ewwel edizzjoni ta' din il-kronoloġija kienet pubblikazzjoni ċkejkna li ħarġet bl-inizjattiva tal-Għaqda tal-Malti (Università) fi-2002. Issa f'idejkom għandkom verżjoni ferm aktar dettaljata f'dik li hi informazzjoni u ferm aktar lussuża f'dik li hi produzzjoni. Nirringrazzja lil Heritage Malta li daħlu għal din il-biċċa xogħol ambizzjuża sabiex jikkommemoraw kif xieraq iċ-ċentinarju tal-Akkademja tal-Malti (1920-2020), qabel magħrufa bħala l-Għaqda tal-Kittieba tal-Malti, kif ukoll għeluq il-mitt sena mit-tfassil tal-alfabett Malti mill-istess Għaqda (1921-2021). L-istorja sħiħa ta l-letteratura Maltija għad trid tinkiteb. Tabilħaqq jeżistu diversi studji li jitfgħu dawl fuq l-evoluzzjoni letterarja ta' ġensna iżda, anki jekk ikollna niġbruhom flimkien, xorta ħa jibqgħalna ħafna lakuni x'nimlew. Snin ilu Oliver Friggieri kien ippubblika l-ewwel volum tal-istorja tal-letteratura Maltija. Dan, ċertament, mela vojt kbir iżda xorta jkollna nistqarru li għadna sajmin sew minn tagħrif relatat mal-ġrajja bikrija tal-letteratura tagħna, apparti l-fatt li l-volumi l-oħra ta' din l-istorja, għal xi raġuni, baqgħu ma dehrux. Fil-qasam lingwistiku, il-volum li-Malti: Elf Sena ta' Storja ta' Joseph M. Brincat waqa' bħall-manna mis-sema, anki jekk għal darb'oħra t-tagħrif fuq il-ġrajja bikrija ta' lsienna għadu tassew skars