L-aħwa Tommaso u Filippo Dingli

Abstract

Il-knisja parrokkjali fi-ibliet u l-irħula Maltin u Ghawdxin hi ċentru ta' qima u devozzjoni. Barra milli hija post pubbliku, il-knisja hi lok li żżewweġ f'ħolqa waħda dak li hu uman ma' I-element reliġjuż u spiritwali. Għalhekk f'kull proġett għall-bini ta' knisja ġdida, fost bosta oħrajn, kien u għadu meħtieġ sal-lum, is-sehem ta' arkitett ta' ħila biex ifassal il-pjanta u numru ta' artisti biex ikomplu jsebbħu t-Tempju t'Alla b'diversi opri ta' l-arti. Żgur li l-aħwa Tommaso u Filippo Dingli li jmorru lura sas-seklu sbatax, huma eżempju validu biex insaħħu din il-fehma. Ta' l-ewwel kien arkitett famuż waqt li l-ieħor stabbilixxa ruħu bħala pittur popolari, l-aktar fejn jidħol l-arti sagra. Ftit teżisti dokumentazzjoni dwar ġrajjiet dawn iż-żewġt aħwa ta' ċertu isem, imma se nagħmlu mill-aħjar biex minn dak li rnexxielna nsibu, inkunu nistgħu nsegwu l-passi ewlenin kemm ta' ħajjithom u kif ukoll tal-karriera brillanti tagħhom.