Il-festa ta' Santa Marija ta' Ħal Xluq

Abstract

Sa minn żmien twil ilu, il-Maltin u l-Għawdxin kienu jiċċelebraw il-festa tat-tlugħ is-sema ta' Omm il-Feddej bl-akbar għożża u ħrara. Ma kellhomx għalfejn joqogħdu jistennew lill-Vatikan jiddikjara d-Domma ta' l-Assunzjoni biex jemmnu b'qalbhom u ruħhom kollha f'dan ir-raba' misteru tal-glorja magħdud fit-talba tar-Rużarju. L-imħabba ta' missirijietna u ommijietna lejn Santa Marija mhix murija biss fin-numru estensiv ta' parroċċi ddedikati lill-Assunzjoni, imma wkoll fl-għadd kbir ta' kappelel imxerrdin fil-kampanja u l-irħula li huma wkoll iddedikati f'ġieħ Marija mtellgħa fil-glorja tal-ġenna bir-ruħ u l-ġisem. Waħda minn dawn il-kappelel hija dik magħrufa bħala Santa Marija ta' Ħal Xluq, li tinsab fil-limiti ta' Citta Ferdinand, fit-triq li mis-Siġġiewi twasslek għall-Qrendi.