L-ikel fir-Randan, il-Ġimgħa l-Kbira u l-Għid : aspetti simboliċi, storiċi u kulinarji

Abstract

Meta nitkellmu dwar l-ikel u l-Ġimgħa l-Kbira, fir-realtà nkunu qed nitkellmu dwar vjaġġ kulinarju li jkopri madwar sitt ġimgħat. Dan il-vjaġġ jibda mill-Karnival, ikompli tul ir-Randan, iwassal sal-Ġimgħa Mqaddsa u jispiċċa fl-Għid il-Kbir. Kemm f’Malta, kif ukoll f’pajjiżi oħra Kattoliċi, l-għażla t’ikel offruta f’dan il-perjodu, hija msejsa fuq ċerta prinċipji u simboliżmu relatati mal-astinenza, penitenza, frugalità u karità, kif ukoll il-mewt ta’ Kristu, il-qawmien mill-mewt u ħajja ġdida. F’dan il-kapitlu se nagħti titwila primarjament lejn l-ikel tar-Randan, il-Ġimgħa l-Kbira u l-Għid f’Malta. Xi wħud mid-drawwiet li bdew sekli ilu, baqgħu magħna, għalkemm forsi ħadu xejra kemxejn differenti tul iż-żmien. Se nintroduċi wkoll xi drawwiet interessanti minn kulturi oħra. Dawn ta’ spiss juru l-universalità ta’ tifsiriet u konnessjonijiet tal-ikel mal-fidi Kattolika. [Silta mill-kapitlu]