Il-Każ Kurjuż ta’ Rosa Mifsud, 1774

Abstract

Wieħed mill-aktar każijiet kurjużi fl-istorja medika ta' Malta huwa bla dubju ta ' xejn dak ta' Rosa (jew Rosaria) Mifsud minn Ħal Luqa. Dan il-każ, li seħħ fl-1774, ma kienx irrappurtat minn Dun Ġużepp Micallef fil-ktieb tiegħu Ħal Luqa: Niesha u Ġrajjietha (1975), aktarx minħabba in-natura kontroversjali tiegħu. Dan il-każ kien investigat għall-ewwel darba mill-istoriku Dr Paul Cassar, li ppubblika l - istħarriġ tiegħu, intitolat 'Change of Sex Sanctioned by a Maltese Law Court in the 18th Century', fil-British Medical Journal tal-11 ta' Diċembru 1954. Fuq din il-ġrajja tassew stramba kitbu wkoll Dr Giovanni Bonello u Dr Robert Attard. Fir-reġistri parrokkjali ta' Ħal Luqa niltaqgħu mal-magħmudija ta' ċerta Primitiva Rosa Mifsud, bint Ġużeppi u Tereża, li ġġib id-data tat-8 ta' April 1755. Għaldaqstant, meta ġara l-każ, Rosaria kellha 19-il sena (u mhux 17 jew 18 kif isostnu d-dokumenti ta' dak iż-żmien). Jista' jkun li kienu jsejħulha Rosa għax l-ewwel isem tagħha, Primitiva, kien stramb wisq.