Traskrizzjonijiet operistiċi fl-arkivju tal-Banda 12th May

Abstract

Ftit ħafna huma dawk il-każini tal-banda li m’għandhomx xi tip t’arkivju artistiku b’xogħlijiet ta’ surmastrijiet Maltin u barranin maħżunin b’għożża fihom. Aktarx kull banda ssibilha xogħlijiet ta’ dawk is-surmastrijiet li minn żmien għal ieħor ikunu ddiriġewha u ħallewlhomlha bħala rigal. Dawn jistgħu jvarjaw minn innijiet kbar sa marċi brijużi. Xi baned sfortunatament kienu tilfu parti sostanzjali mill-arkivju tagħhom wara li l-każin tagħhom spiċċa ġġarraf fi żmien il-Gwerra, bil-partituri jintilfu darba għal dejjem. Hemm oħrajn imbagħad, li tteħditilhom xi mużika minn ġo fihom bla permess, jew ġew neqsin sforz it-traskuraġni min-naħa ta’ min suppost kien inkarigat li jieħu ħsiebhom. Fortunatament, illum il-ġurnata, is-soċjetajiet mużikali, qodma u ġodda, huma kollha konxji ta’ dan il-patrimonju imprezzabbli fi ħdanhom, u li jifforma parti integrali min-nisġa ta’ ġrajjiethom. Xogħol l-arkivista huwa għalhekk, li jara li dawn jinżammu fi stat tajjeb u maqfulin taħt ċavetta, u jinħarġu biss għal biex jindaqqu waqt xi programm sabiħ fuq il-planċier waqt xi programm annwali jew okkażjoni kommemorattiva oħra.