Il-kitbiet akkademiċi ta’ J.J. Camilleri

Abstract

Il-probabilità hija li dawk li jħobbu l-letteratura Maltija iktar jafu lil J.J. Camilleri għar-rumanzi jew għan-novelli tiegħu milli għal tip ta’ kitbiet oħra. Il-lista tar-rumanzi ta’ Camilleri tinkludi fost l-oħrajn Aħna Sinjuri, L-Għar tax-Xitan, Luteru, Ulied il-Qawsalla u Is-Sejħa tal-Art. Uħud minn dawn ir-rumanzi ġew studjati għall-eżamijiet tal-Matrikola u oħrajn inqraw fuq ir-radjijiet lokali. Aktarx li l-aqwa rumanz tiegħu, u l-iktar wieħed li kiseb kunsens, hu L-Għar tax-Xitan. Jeżistu tal-inqas tlieta jew erba’ rumanzi oħra ta’ J.J. Camilleri li baqgħu ma ġewx ippubblikati u jaf ikunu ppubblikati fis-snin li ġejjin. Li jintesa huwa li l-fatt li l-kitbiet ta’ Camilleri jinkorporaw ukoll diversi kitbiet akkademiċi u oħrajn semi-akkademiċi fejn l-awtur kiteb u ħadem, fost l-oħrajn u aktarx l-iktar, fuq l-istorja tal-edukazzjoni f’ Malta speċjalment dik tas-seklu 19.