Erba' kwadri ġodda jirrappreżentaw l-opri tal-ħniena

Abstract

Qabel il-jiem tal-Festa ta’ San Ġorġ f’Lulju twaħħlu erba’ pitturi ġodda fil-Bażilika Ġorġjana bħala parti mill-Proġett Fejn hu ħuk?. Manuel Farrugia, artist żagħżugħ Għawdxi, ġie kkumissjonat joħloq sett ta’ tmien pitturi – erbgħa tlestew issa u erbgħa oħra jitlestew is-sena d-dieħla – għall-pendenti taż-żewġ koppletti tan-nofs fin-navi tal-Bażilika, li jissimbolizzaw l-Opri korporali tal-Ħniena biż-żieda tal-aħħar waħda miżjuda ma’ dawk tradizzjonali fl-2016 mill-Papa Franġisku dwar l-ambjent. F’kull pittura, fiċ-ċentru tidher dejjem il-figura protagonista b’dija wara rasha, mhux għax hi qaddisa, iżda għax Ġesù jagħmel lilu nnifsu preżenti fiċ-ċkejknin u l-foqra ta’ żmienna. Jidhru mbagħad dejjem żewġ figuri oħra fuq il-lemin u fuq ix-xellug rispettivament: dik tal-komunità Nisranija, u l-figura tas-soċjetà. Minn dawn l-erba’ pittura tispikka dik tal-barrani, li l-fattizzi tiegħu huma ta’ Lassana Cisse, ir-raġel li fis-6 ta’ April 2019 inqatel kiesaħ u biered f’pajjiżna għal motivi razzjali.