Il-festa Maltija : taħlita ta’ tradizzjoni, kontinwità u tiġdid

Abstract

Ilu issa għaddej f’Malta għal numru ta’ snin dibattitu dwar x’valur għandhom jew għad baqgħalhom il-festi tal-ibliet u l-irħula meta qed naraw tant taqlib fis-soċjetà Maltija. Hemm min qed isostni li tant inbidlu l-festi, u l-mod kif qed niċċelebrawhom, li ma nistgħux ngħidu li dawn għadhom festi awtentiċi. Oħrajn josservaw ukoll li n-nies fiż-żmien mgħaġġel tal-lum m’għadx għandhom ċans jieħdu sehem fl-attivitajiet li joffru l-festi Maltin kif kienu jagħmlu dari. Ta’ min jgħid li dawn huma kollha osservazzjonijiet li għandhom element ta’ verità fihom, imma huma wkoll argumenti li jistgħu jiġu diskussi u dibattuti b’evidenza li nistgħu narawha u nidentifikawha jekk inkunu attenti biżżejjed għas-sinjali kollha taż-żmien.