Devozzjoni lejn l-Immakulata Kunċizzjoni fl-Imqabba : avveniment prinċipali mit-twaqqif ta' dan is-seklu

Abstract

F' diversi lokalitajiet Maltin kien hemm devozzjoni u ċelebrazzjonijiet ad unur l-Immakulata Kunċizzjoni u ħafna drabi dawn kienu marbuta ma' festi f'ġieħ il-Madonna tal-Gilju. Fl-Imqabba, id-devozzjoni lejn l-Immakulata Konċepiment ta ' Marija hija ferm eqdem mid-definizzjoni tad-Domma fl-1854. Id-devozzjoni wasslet sabiex fl-1772 numru ta' qassisin u devoti talbu lill-Isqof Fra Giovanni Carmine Pellerano sabiex iwaqqfu Fratellanza ta' devozzjoni taħt il-protezzjoni ta ' Marija Immakulata. Kien żmien il-kappillan Giacomo Michele Tortella, li ta l-parir tiegħu dwar it-talba għat twaqqif tal-Fratellanza fit-3 ta' Jannar 1772. Fiha stqarr li kien iħoss il-bżonn li jiġu approvati s-sittax-il statut u regolamenti sabiex tiġi mwaqqfa l-Fratellanza fl-lmqabba. Il-regoli prinċipali ta' l-Istatut hekk kif proposti mid-devoti Mqabbin u maqbula mill-Kappillan Tortella nistgħu narawhom f'dan l-artiklu.