Mill-Arkivji : Programme 12 : Charles Xuereb

Abstract

Fil-programm ‘Mill-Arkivji’ tal-25 ta’ Diċembru 2022 se niltaqgħu ma’ Dr. Charles Xuereb, veteran fil-qasam tax-xandir lokali, skular u edukatur fl-istudji tal-Identità Maltija b’enfasi fuq il-perjodu Franċiż u l-memorja kollettiva. Charles Xuereb għandu dottorat mill-Università ta’ Malta kif ukoll riċentament ġie dekorat mill-Académie française ta’ Pariġi għall-kontribut li ta fit-tixrid tal-kultura Franċiża f’Malta tul il-karriera tiegħu. It-teżi tiegħu tad-dottorat issarfet fil-pubblikazzjoni bl-isem ta’ ‘France in the Maltese Collective Memory: Perceptions, Perspectives, Identities after Bonaparte in British Malta’ (Malta University Press). Riċentament nieda l-pubblikazzjoni ‘Decolonising the Maltese Mind: In search of Identity’ (Midsea Books). Charles se jkellimna dwar is-sehem tal-Franċiżi f’Malta, l-istorja tat-tmiem l-Ordni ta’ San Ġwann f’Malta bil-ħafna kavallieri Franċiżi, il-bosta Maltin li telqu lejn Franza wara l-okkupazzjoni tal-Franċiżi f’Malta bejn l-1798 u l-1800 fosthom Nicolo Isouard, kif ukoll l-esportazjoni tal-larinġa Maltija lejn Franza mit-Tuneżija. Kif kien il-kummerċ bejn Malta u Franza? X’dokumentazzjoni nsibu f’dan il-qasam? X’inhu l-Consolato del Mare? Huwa jagħtina wkoll tagħtif interessanti dwar il-memorja kollettiva b’relazzjoni ma’ Franza u l-Franċiżi f’Malta. X’kienu jisimhom uħud mit-toroq fil-Belt fiż-żmien Vaubois u sħabu? Fejn kienet Place de l’Egalité? Dr. Xuereb jagħti ħarsa dwar ir-riċerka li għamel l-Arkivji Nazzjonali b’ħarsa lejn il-volumi tal-Epoca Gallica; ir-riċerka li għamel fid-dokumenti tal-Ordni u dawk imsejħa Mixxelanja fil-Bibljoteka Nazzjonali, kif ukoll f’arkivji f’Pariġi b’rabta ma’ Malta. X’sab interessanti marbut mal-grajjiet ta’ Mikiel Anton Vassalli? Bla dubju, f’din l-intervista Dr. Xuereb jargumenta dwar il-George Cross fuq il-bandiera Maltija, il-bosta monumenti li l-Imperu Brittaniku għamel f’Malta, u l-monument tar-Reġina Vittorja fi Pjazza Repubblika, jew kif ħafna jafuha Pjazza Reġina.