Mill-Arkivji : Programme 20 : Liam Gauci

Abstract

Fil-programm ‘Mill-Arkivji’ tal-lum 19 ta’ Frar 2023 se niltaqgħu fil-qrib mar-riċerkatur Liam Gauci, il-Kuratur tal-Mużew Marittimu fi ħdan Heritage Malta. Huwa se jmur lura fiż-żmien meta kien qed jara lil nannuh jagħmel id-dgħajjes. Iġib il-memorji ta’ meta ltaqa’ ma’ Ġużeppi Muscat li dan komplu xprunah għar-riċerka marittima. Min kien Gużeppi Muscat u x’kontribut ta f’dan il-qasam, inkluż il-Mużew Marittimu?

Liam Gauci se jgħid kif beda jirriċerka d-dokumenti tat-Tribunal tal-Armamenti? Kien għodu qata’ qalbu li jsibhom… Kif kompla l-vjaġġ fir-riċerka ta’ dawn id-dokumenti? Iżda x’wassal li bdiet tinteressah ir-riċerka fuq il-kursara? X’impatt ħallew fuqu l-Professuri Wettinger u Mallia Milanes?

F’dawn id-dokumenti fl-Arkivji Nazzjonali sab ħafna episodji interessanti fuq il-kursara. Isemmi wħud mill-protagonisti fil-priża fuq il-baħar. Min kien Guglielmo Lorenzi u Giacomo Mitrovich? Kif jidħol Mikiel Anton Vassalli fir-riċerka li għamel Liam Gauci?

Riċerka oħra li għamel Liam Gauci kien fuq it-Tribunal tal-Konslu tal-Baħar. Irriċerka ħafna wkoll fl-Arkivju Notarili fir-reġistri tan-Nutar Guiliano Chiappe.

Din ir-riċerka hija evidenti wkoll fit-teżi tal-maġisteru tiegħu fl-Università ta’ Malta kif ukoll f’diversi papers li kiteb u l-pubblikazzjoni ‘In the Name of the Prince’. Nistennew pubblikazzjoni oħra dalwaqt.

Barra dawn, Gauci jinteressah ukoll x’tip ta’ ikel kienu qed jieklu fiż-żmien l-Ordni. Jitkellem ukoll fil-ħidma tiegħu fil-Mużew Marittimu.