Mill-Arkivji : Programme 32 : Katja Zahra Camilleri

Abstract

Il-mistiedna tal-lum fil-programm ‘Mill-Arkivji’tal-21 ta’ Mejju 2023 hi Katja Zahra Camilleri li hija librar bi professjoni fil-librerija tal-Junior College fi ħdan l-Università ta’ Malta.

Hija ħa tkellimna dwar il-kollezzjoni kbira ta’ kotba u annwali ta’ programmi tal-festa, kwantità kbira li kull sena dejjem qed tiżdied. Katja ssemmi l-ħidma li jagħmlu l-librara sħabha biex jiġbru, jikkompilaw, jikkatalogaw, u jippreservaw dawn il-programmi taħt saqaf wieħed bil-għan li jkunu aċċessibli u konsultati.

Tgħid li parti mill-ħidma tagħhom hija li jagħmlu diġitiżazzjoni ta’ wħud mill-artikli fost l-aktar interessanti propju wara li jiflu fid-dettal kull ktieb li jasal għandhom. Dawn l-artikli diġitiżati huma aċċessibli wkoll fis-sit tal-librerija tal-Università.

Katja tagħti dettalji interessanti dwar l-eqdem programmi tal-festa li jmorru lura bosta snin ilu, aktar ukoll minn 75 sena ilu. Tgħid li barra l-kotba tal-programmi tal-festa, għandhom ukoll ġabriet interessanti ta’ fuljetti, ġurnali u anke santi li nħarġu matul iż-żmien b’rabta mal-festi partikolari. Fihom tara l-progress tal-festa, l-istampar, ir-reklami u l-ispiża tal-festa. X’kien qed jinħareġ fiż-żmien il-pandemija tal-Covid?

Fost programmi mill-aktar interessanti nsibu dak maħruġ għall-festa tal-Qalb ta’ Ġesu f’Kemmuna fl-1938. Barra dawn il-programmi, il-librerija għandha wkoll rivisti li jmorru snin ilu, bħal Il-Furjana, Tabor u oħrajn. Magħhom insibu wkoll kommemorazzjonijiet li nħarġu biex jikkomemoraw xi anniversarju.