X-ray pastorali tal-Papa Benedittu XVI

Abstract

Fis-sisien tal-missjoni pastorali tal-pontifikat tal-Papa Benedittu XVI, insibu t-tfittxija kontinwa għall-verita', l-għajxien tal-liberta', u t-tħaddin ta' mħabba awtentika. L-artiklu jifli l-ewwel sentejn u nofs tal-pontifikat u jasal għal analiżi proviżorja tal-istil tat-teologu Joseph Ratzinger li fl-eta' ta' 78 sena sab ruħu jmexxi l-Knisja. L-aspetti prinċipali li l-artiklu jittratta huma: (a) pastorali kateketika, għaliex Benedittu XVI kellu kapaċita' straordinarja li jgħallem permezz ta' kliem sempliċi; (b) pastorali ta' rikonċiljazzjoni li kienet ġejja minn finezza intellettwali kbira li dehret fil-ħerqa tieghu (spiss mhix mifhuma) li jibni l-pontijiet ma' min tbiegħed jew kien mifrud mill-Knisja; (c) pastorali ta' paċenzja eżemplari, għax wera ruħu bħala ragħaj li kien lest li jistenna l-aħjar mument għal xi deċiżjoni li jkun ilha li rrifletta dwarha; (d) pastorali mibnija fuq konsultazzjoni u smigħ għax kellu personalita' kawta u moderata. Minn dan l-istudju joħroġ ċar li fis-sisien tal-pontifikat tiegħu hemm it-tfittxija għall-verita'. Illum, meta nħarsu lura lejn pontifikat li ntemm fl-2013, nikkonkludu kemm l-analiżi tal-artiklu hija minna.