“Kull kelma tiegħek tidwi...” Analiżi ta’ ‘Tislima lil Kristu Sidna’ ta’ Oliver Friggieri

Abstract

Kultant, tagħraf il-valur veru ta’ persuna dakinhar li titlifha. U hekk ġara nhar il-21 ta’ Novembru tal-2020, meta ħalliena Oliver Friggieri. In-nazzjon beka t-telfa ta’ ħassieb ta’ ispirazzjoni Kristjana, poeta ta’ nifs nazzjonali, u figura unitarja ta’ dan it-tribù b’żewġ bnadar. Il-mijiet ta’ studenti li għallem tul il-ħidma sfiqa u eżemplari tiegħu l-Università ta’ Malta, tnikktu meta saru jafu li ħalliehom l-għalliem eċċezzjonali tagħhom, raġel mill-Furjana mimli għerf u dehen, li f ’qalbu kellu tassew imħabba speċjali għal Malta u t-tieni, għal-Letteratura tagħha, ċkejkna u sħiħa fl-istess ħin. Il-membri għeżież ta’ familtu jistgħu jgħidu li tilfu lir-raġel, lill-missier, lin-nannu, lil ħuhom, u l-bqija. Imbagħad, xi wħud li mas-snin it-toroq tagħhom issallbu u żżarġnu ma’ tiegħu, u saru jafuh mill-qrib, b’dak il-karattru dħuli u b’dik it-tbissima mistħija tiegħu, setgħu jgħidu li tilfu ’l ħabibhom, Oliver.