Il-mara tal-antieroj : ir-relazzjoni tal-figura femminili mal-iżvolġiment tal-antieroj fil-letteratura moderna

Abstract

Dan l-istudju jittratta r-relazzjoni bejn l-antieroj tar-rumanz Modernista Malti tas-snin sebgħin mal-karattri femminili li magħhom kellhom xi tip ta’ relazzjoni intima. L-istudju jikkonċentra fuq dawn il-personaġġi femminili li għalkemm huma nfushom huma antieroj, lawturi rġiel jittrattawhom b’mod differenti minn kif jittrattaw lill-protagonisti maskili. Mill-analiżi joħroġ li n-nisġa tar-rumanzi dejjem tindika li l-protagonisti maskili, appuntu għax huma antieroj, jispiċċaw dejjem telliefa u joħroġ ukoll li l-kawża finali ta’din it-telfa dejjem tkun l-akkumpanjatriċi tal-antieroj. B’hekk, filwaqt li l-protagonist maskili jispiċċa jitqies dejjem bħala vittma, il-mara li jkollu miegħu dejjem tidher f’dawl ikrah għax tkun hi li tagħti d-daqqa finali fit-telfa tal-protagonista. Dawn l-osservazzjonijiet huma komuni fir-rumanzi studjati f’din it-teżina, jiġifieri, Il-‘Gaġġa’ u ‘Samuraj’ ta’ Frans Sammut, ‘L-Istramb’ u ‘Il-Gidba’ ta’ Oliver Friggieri, ‘L-Għar tax-Xitan’ ta’ J.J. Camilleri, u ‘Ħdejn in-Nixxiegħa’ ta’ Trevor Żahra. Għaldaqstant, l-istudju jgħarbel l-inġustizzji li permezz tagħhom il-mara għadha qiegħda tiġi pperpetwata bħala l-‘ieħor’ hekk kif tispjega fit-teorija Femminista tagħha Simone de Beauvoir.