L-akkwist tal-ġens grammatikali minn studenti fil-livell sekondarju fit-tagħlim tal-Malti lingwa barranija

Abstract

It-tagħlim tal-Malti bħala Lingwa Barranija (MLB), huwa kunċett relattivament riċenti. Din ir-riċerka saret biex titfa’ dawl fuq l-aspett grammatikali tal-ġens sabiex l-edukaturi jifhmu aħjar l-interlingwa tal-istudenti tal-MLB. L-għanijiet ta’ din id-dissertazzjoni huma tnejn: l-ewwel nett l-analiżi tal-interlingwa ta’ studenti internazzjonali tal-MLB, li ssir biex nifhmu aħjar kif huma jassenjaw il-ġens lil nomi b’etimoloġiji differenti; u t-tieni biex nifhmu d-diffikultajiet li jsibu u l-għajnuniet li jeħtieġu l-istudenti u l-għalliema tal-MLB b'mod ġenerali. Nifhmu l-esperjenza tagħhom tat tagħlim tal-MLB u l-interlingwa li l-istudenti jibnu, filwaqt li nanalizza wkoll id-differenza li jista’ jkun hemm skont l-etimoloġija tan-nom u l-lingwa nattiva tal-istudent. Dawn l-għanijiet nilħaqhom billi nagħmel użu minn żewġ għodod ta’ riċerka, jiġifieri l-intervisti ma’ studenti u għalliema tal-MLB, kif ukoll fuljett ta’ assessjar li kien fih disa’ eżerċizzji grammatikali maħsubin biex jikxfu l-interlingwa fil-qasam tal-ġens tan-nom. Fl-ewwel paġna tal-fuljett, l-istudenti kienu mitluba jimlew xi dettalji bħall-pajjiż nattiv, il-lingwi li jitkellmu, u xi mistoqsijiet ġenerali fuq it-tagħlim tal-Malti fost dettalji oħra sabiex inkun nista’ nifhem aħjar xi għażliet li għamlu fil-bqija tal-eżerċizzji.