Mill-Arkivji : Programme 39 : Rachel Grillo u James Licari

Abstract

Fil-programm ‘Mill-Arkivji’ tat-22 ta’ Ottubru 2023 niltaqgħu ma’ żewġ mistiednin impjegati f’Heritage Malta. James Licari li huwa konservatur, restawratur u riċerkatur, u Rachel Grillo li hija l-ko-ordinatur fis-sezzjoni tar-riċerka fi ħdan l-istess aġenzija. Rachel Grillo u James Licari se jkellmuna fuq ir-riċerka li saret għall-wirja [Be]Loved Malta: Stories of Sexual and Gender Identity li ttellgħat fil-Main Guard, il-Belt Valletta fl-okkażjoni tal-Euro Pride. Grillo u Licari għamlu riċerka kumplessa u intensiva fuq xenarju li sa ftit tal-jiem ilu ftit li xejn konna nafu dwaru. Rachel Grillo se tgħidilna fuq l-identità ta’ Luca Lo Pogio, storja li tmur fil-bidu tas-seklu 17. Tal-istess seklu, nisimgħu r-rakkont fuq Anna Zammit. X’kienet l-istorja ta’ Rosaria Mifsud (1754-1793) li saret Rosario? Min kienet Maria Schembri li wara ġiet identifikata bħala Mario Schembri? James Licari jiffoka fuq John Baptist Francia u William Nathaniel Fenton li għexu matul is-seklu l-ieħor. Tispikka l-istorja ta’ Brigitte St John, imwielda Malta u fil-bidu tas-sittinijiet telqet lejn l-Ingilterra u kellha karriera li ħalliet impatt qawwi, saħansitra rrekordjat żewġ kanzunetti, waħda minhom hija ‘Blue Beat Baby’. Kif inhi l-istorja ta’ Brigitte St John u x’impatt ħalliet fuq Katya Saunders? Dawn l-istejjer jinsabu miktuba b’ritratti esklussivi fil-ktieb ‘[Be] loved Malta: Stories of Sexual and Gender Identity’ ippubblikat minn Heritage Malta.