L-iskejjel primarji tal-Mosta 125 sena ta’ ħidma edukattiva 1898/99–2023/24

Abstract

Hija inizjattiva mill-isbaħ li l-komunità Mostija tfakkar anniversarji fl-istorja tagħha. Dan juri apprezzament għal dak li sar qabilna, ferm iktar meta qegħdin infakkru 125 sena mill-bini tal-iskola primarja, il-post li kien proprju ppjanat biex jgħallem ulied il-familji ta’ dik l-epoka. Minn dawk is-snin – 1898-99 – lil hawn, ġenerazzjonijiet sħaħ tgħallmu u trabbew f’dan il-bini biex kibru f’nisa u rġiel li kabbru l-familji rispettivi tagħhom u taw kontribut prezzjuż lill-ħajja tal-Mosta u l-Mostin. L-anniversarji ma jiġux biss biex infakkruhom kif jixraq, imma wisq iktar biex nitgħallmu minnhom. Fil-każ tal-iskola, nitgħallmu mill-viżjoni li kellhom nannietna u bużnannietna li wliedhom jitrawmu u jiffurmaw ruħhom b’tagħlim li jirrendihom aktar kapaċi minn dawk ta’ qabilhom. Illum nitgħallmu mir-rieda li kellhom li jwettqu proġett għas-settur edukattiv sa mill-età bikrija f’epoka meta t-tagħlim ma kienx għadu obbligatorju f’pajjiżna.