Mill-Arkivji : Programme 42 : Marco Galea

Abstract

Fil-programm ‘Mill-Arkivji’ tad-19 ta’ Novembru 2023 niltaqgħu fil-qrib mar-riċerka u l-istudji li għamel il-Prof Marco Galea dwar it-teatru Malti. Il-Prof Marco Galea studja fl-Università ta’ Malta u fid-Dipartiment tad-Drama u l-Arti Teatrali tal-Università ta’ Birmingham fejn ġie mogħti PhD fl-2004. Huwa rriċerka u ppubblika dwar l-istorja tat-teatru Malti, il-letteratura Maltija, u t-teatru postkolonjali. Bejn l-2005-2007 kien President ta' L-Akkademja tal-Malti (Għaqda Kittieba Maltin) li matulu l-organiżazzjoni Maltija ġiet aċċettata fil-Kunsill tal-Kittieba Ewropej. Id-dramm tiegħu li jiċċelebra l-ħajja u x-xogħlijiet ta’ Francis Ebejer, ‘Għażiż Francis’, kellhu prestazzjoni ta’ success fl-2007 u fis-sena ta’ wara waqt il-Malta International Arts Festival. Huwa kien lettur fl-Istitut tal-Mediterran fl-2010 biex jgħallem l-Istudji Teatrali. Huwa kien strumentali fit-twaqqif u t-tmexxija tal-Arkivju Diġitali ta' School of Performing Arts, proġett li jistinka biex jiddokumenta l-istorja tal-prestazzjoni f’Malta u jagħmilha disponibbli għar-riċerkaturi. F’Ottubru tal-2021 inħatar Kap tad-Dipartiment tal-Istudji Teatrali fl-Universita ta’ Malta. Il-Prof Marco Galea ħa jgħidilna fil-qosor dwar l-istorja tat-teatru Malti u min fejn għamel ir-riċerka tiegħu għat-teżi tad-dottorat, kif ukoll għal diversi pubblikazzjonijiet li għamel. Min kien M’Ang Borg? X’kontribut ta lit-teatru? Naraw il-firxa tat-teatrini madwar Malta, anke wkoll fis-swali tal-kappillan. Iġib il-memorji ta’ meta kienu jsiru l-kompetizzjonijiet tad-drammi fl-Imġarr. Min kien għalieh Francis Ebejer? X’impatt ħalla fit-teatru modern? Kif tinħass is-sens ta’ identita’ Maltija fix-xogħlijiet tiegħu, u x’inhu l-aktar xogħol li jogħġob lill-Prof. Marco Galea? Il-Prof Galea jgħidilna wkoll x’qed isir fi ħdan l-Arkivju Diġitali ta’ School of Performing Arts biex l-istorja tal-prestazzjoni f’Malta tkun preservata u disponibbli għar-riċerkaturi.