Mill-Arkivji : Programme 47 : Rakele Fiott

Abstract

Fil-programm 'Mill-Arkivji' tal-31 ta' Diċembru 2023, se nerġgħu niltaqgħu ma' Rakele Fiott li kienet magħna fit-tieni programm ta’ 'Mill-Arkivji' f’Ottubru tal-2022. Rakele hija għalliema żgħażugħa li tħobb l-istorja, b’mod partikulari l-istorja ta’ Malta b’enfasi għal żmien l-Ordni. Hija gradwata mill-Universita ta' Malta. It-teżi tal-Baċċellerat tagħha tittratta dwar wieħed minn nutara tas-seklu 18, b’enfasi fuq il-mara, l-ekonomija u l-interazzjoni soċjali fis-soċjeta skont kif hemm miktub fl-atti tan-nutar Barnardo Maria Callus, propju fit-tieni volum iddatat 1746-1748. Għandha wkoll Maġisteru fl-Istorja b’suġġett interessanti ħafna - it-tfal f’Malta fis-seklu 18 li dwaru Rakele se tkellimna fid-dettal ta' kif għamlet ir-riċerka tagħha u tagħtina ħjiel dwar id-dokumenti li sabet.

Rakele titkellem dwar it-titlu tat-teżi tagħha ‘Puellæ et pueri : aspects of the lives of children and young people in eighteenth-century Malta (c.1740s-1790s)’. Għala għażlet dan il-perjodu partikolari? X’ kienet id-dinamika tal-Qrati fit-tieni nofs tas-seklu 18? Kif kienet tħares il-Qorti lejn it-tfal u x’kienet il-kriminalita tat-tfal? Fejn l-aktar bħala belt jew raħal? Subien jew bniet? Titkellem ukoll fuq tfal mitluqa jiġġerrew fit-toroq, abbandunati u r-rota ta’ Santu Spirtu. Min kien qed jieħu ħsiebhom dawn it-tfal? Hija tgħid li r-riċerka għamlitha minn fuq il-libri tal-carcerati, suppliki mit-Tribunali u Qrati taż-żmien l-Ordni ta’ San Ġwann li jinsabu fl-Arkivji Nazzjonali (Banca Giuratale fl-Imdina); xi proċessi kriminali li jinsabu fl-Arkivji Nazzjonali; l-Arkivju Notarili u l-Arkivju tal-Ordni fil-Bibljoteka Nazzjonali.