Mill-Arkivji : Programme 48 : Caroline Tonna

Abstract

Il-mistiedna tal-programm ‘Mill-Arkivji’ tas-7 ta’ Jannar 2024 hija s-Sa Caroline Tonna, riċerkatriċi tal-istorja tal-arti li tispeċjalizza fuq l-istorja tal-moda f’Malta. Hija l-kuratriċi tal-Mużew Palazzo Falzon fl-Imdina. Minn dejjem kienet interessata fl-arti u l-moda tant li matul is-snin kienet editriċi ta’ diversi magazines u ipproduciet programmi għar-radju u televiżjoni, fosthom sensiela ta’ 13-il programm bit-titlu ‘Moda, l-istorja’, liema programmi kienu mwassla fuq ir-riċerka li għamlet hija stess għall-istudju terzjarju tagħha. Hija wkoll kienet appuntata kuratriċi tal-kostumi fil-wirja ‘Music in Malta: From Pre-History to Vinyl’ imtella’ mill-Fondazzjoni Patrimonju Malti. Hija kienet ukoll membru fil-bord tal-Kunsill Malti għall-Arti. Caroline Tonna għandha Baċċelerat fl-Antropoloġija, u fl-istorja tal-Arti; u Maġisteru fl-arti u l-istorja tal-arti bi speċjalizazzjoni fuq il-libsa tas-seklu 19, u l-fotografija. Hija awtriċi ta’ diversi papers kif ukoll preżentat diversi lectures fuq dan is-suġġett. Hija l-awtriċi tal-ktieb Society Fashion in Malta: The Portrait Photography of Leandro Preziosi 1830-1869, ippubblikat mill-Fondazzjoni Patrimonju Malti li rebaħ l-unur tal-aħjar produzzjoni waqt il-Premju Nazzjonali tal-Ktieb li sar f’Novembru 2023. Caroline Tonna ħa tiddiskuti x'impatt ħalla artistikament bid-dħul tal-fotografija f'Malta, u kif tidher it-tifla ta’ Ġużeppi Cali, Margaret, fl-arti ta' missierha? Titkellem dwar l-artist Edward Caruana Dingli b'kollaborazzjoni ma' Richard Ellis u l-kummerċ li kienu qed jagħmlu mit-turiżmu.

Hija titkellem ukoll fuq l-eleganza, il-modesta, il-moralita u l-modernita fl-arti tal-libsa preżentata fil-fotografija ta’ Leandro Preziosi, b’attenzjoni wkoll lil ġojjelli u x-xagħar bħala parti integrali fl-arti tal-libsa.

Xi sfidi sabet fir-riċerka tagħha mill-gazzetti fil-Bibljoteka Nazzjonali, Inventarji u kuntratti fl-Arkivji Notarili u żjarat f’Mużewijiet?