Mill-Arkivji : Programme 50 : Vincent Caruana Gauci

Abstract

Fil-programm ‘Mill-Arkivji’ tal-21 ta’ Jannar 2024, ħa nitkellmu mas-Sur Vincent Caruana Gauci dwar ir-riċerka li għamel għall-pubblikazzjoni tiegħu dwar il-ġrajjiet tas-Società Filarmonica Maria Mater Gratiæ ta’ Ħaż-Żabbar. Is-Sur Vincent Caruana Gauci huwa edukatur u assistent surmast ta’ skola. Ilu involut sa minn età żgħira fil-volontarjat f’bosta għaqdiet Żabbarin, kemm bħala membru u għalliem fi ħdan is-Soċjetà tad-Duttrina Nisranija, kif ukoll f’diversi kumitati tal-parroċċa. Ġie affiljat bħala soċju sussidjarju mas-Soċjetà Filarmonika Maria Mater Gratiæ fl-2004 fejn serva f’diversi kumitati, fosthom bħala Segretarju tal-Kummissjoni Żgħażagħ, Viċi President u Assistent Segretarju tal-Kumitat Eżekuttiv u Chairman tal-Bord għall-bdil tal-Istatut tas-Soċjetà.

Ilu jikkontribwixxi b’artikli riċerkati għall-pubblikazzjoni annwali tas-Soċjetà u jservi wkoll bħala editur ta’ din il-pubblikazzjoni. Fl-2019 il-Kumitat Eżekuttiv ħatar lis-Sur Caruana Gauci bħala soċju onorarju tas-Soċjetà. L-irwoli attwali tiegħu fis-Soċjetà huma varji u jinkludu l-kitba u r-riċerka, il-banda, ir-relazzjonijiet pubbliċi u l-akkwist ta’ fondi pubbliċi għas-Soċjetà.

Vincent Caruana Gauci ħa jkellimna dwar it-twaqqif tal-banda, il-ħidma ta’ Mro. Giuseppe Micallef (1854-1914), l-Inkurunazzjoni tat-Titular tal-Madonna tal-Grazzja, u t-tradizzjoni tat-teatrini fil-bitħa tal-każin. Caruana Gauci jsemmi l-esperjenzi ta’ riċerka li għamel mid-dokumenti tac-Chief Secretaries to Governor (CSG) fl-Arkivji Nazzjonali, u bosta gazzetti fil-Bibljoteka Nazzjonali flimkien ma’ dokumentazzjoni oħra.