Il-Kult lejn San Filippu Neri fir-raħal tal-Qrendi

Abstract

L-iskop ta' dan l-istudju huwa li jispjega fil-qosor l-istorja tal-kult lejn San Filippu Neri fir-raħal tal-Qrendi u r-rabta bejn dan il-Qaddis u l-Venerabbli Konfraternità tal-Beata Verġni Immakulata ta' Lourdes. Meta l-Kappillan Dun Pietru Pawl Xuereb fl-1878 waqqaf l-Venerabbli Konfraternità tal-Beata Verġni Immakulata ta' Lourdes ġewwa l-Qrendi huwa għażel lil San Filippu Neri biex ikun il-Protettur ta' din il-Konfraternità ġdida. Hawnhekk forsi tiġina f'moħħna din il-mistoqsija; "Fuq liema kriterju, il-Kappillan Xuereb għażel lill-qaddis San Filippu Neri biex jieħu ħsieb spiritwalment din il-Konfraternità li kienet it-tarbija tiegħu?" Għalkemm bħall-qaddisin l-oħra kollha tal-Knisja Kattolika, San Filippu Neri kellu devozzjoni kbira lejn Marija Santissima, mhemmx rabta diretta bejn San Filippu Neri u l-Madonna ta' Lourdes. Madankollu naħseb li kien hemm rabta bejn il-qaddis San Filippu Neri u l-Kappillan Dun Pietru Pawl Xuereb. Hawn irridu niftakru li Dun Pietru Pawl Xuereb kien mill-Isla.