L-użu tat-teknoloġija u t-tagħlim tal-Malti waqt il-COVID-19 : l-esperjenza ta’ erba’ għalliema li jgħallmu fl-ewwel snin tal-primarja

Abstract

Il-pandemija tal-COVID-19 ġiet fuqna ħabta u sabta u laqtet bosta setturi, inkluż dak taledukazzjoni (UNESCO, 2020), fost oħrajn bl-għeluq tal-iskejjel li wassal għat-tagħlim online. F’dan il-punt, it-teknoloġija kienet is-soluzzjoni li l-għalliema kellhom iduru għaliha (Busuttil & Farrugia, 2020). Apparti t-tagħlim online, l-istudenti u l-għalliema esperjenzaw ukoll il-ftuħ tal-iskejjel mill-ġdid imma bir-resrizzjonijiet imposti mis-Supretendent tas-Saħħa. L-iskop ta’ dan l-istudju kwalitattiv kien li bis-saħħa tal-intervisti ma’ erba’ għallliema tat-tieni sena talprimarja jinvestiga l-isfidi/u jew l-opportunitajiet li sabu ma’ wiċċhom l-għalliema, kif ukoll l-istrateġiji li użaw għat-tisħiħ tal-ħiliet tat-taħdit, is-smigħ, il-qari u l-kitba bl-użu tat-teknoloġija matul il-pandemija. Bis-saħħa tal-analiżi tematika, ir-riċerkatriċi identifikat sitt temi komuni li għenuha twieġeb il-mistoqsijiet tar-riċerka. Kif kien mistenni, it-teknoloġija ddominat għat-tagħlim tal-Malti, speċjalment waqt it-tagħlim online, għalkemm l-għalliema integrawha b’ livelli differenti. Mir-riżultati ħarġet l-importanza tas-sapport mill-kollegi u lġenituri. Minn naħa l-oħra fil-klassi bir-restrizzjonijiet, għalkemm is-sitwazzjoni kienet aktar tixbah dak li mdorrijin bih, xorta ħarġu sfidi u/jew opportunitajiet ġodda fosthom l-isfida tad-distanza soċjali u l-użu tal-maskra. Fl-aħħar mill-aħħar, jidher ċar li l-pandemija ħolqot sfidi akbar għall-għalliema tas-snin bikrin peress li l-istudenti tagħhom huma żgħar.