Mill-Arkivji : Programme 56 : Eric Bonanno

Abstract

Il-mistieden fil-programm ‘Mill-Arkivji’ tal-10 ta’ Marzu 2024 huwa s-Sur Eric Bonanno li se jkellimna dwar ir-riċerka li għamel f’bosta arkivji biex jiġbor tagħrif fuq il-familja tiegħu u ta’ martu. Eric Bonanno huwa minn Ħal Qormi, studja fil-Kulleġġ Missjunarju ta’ San Pawl, u kompla l-istudju terzjarju fil-Belt u wara fl-Università ta’ Malta fejn fl-1987 iggradwa bħala għalliem tal-Kimika u l-Bijoloġija. Għallem kemm fl-iskejjel tal-istat u tal-Knisja. Ippubblika xogħlijiet ta’ riċerka f’kotba u rivisti. Illum irtirat fejn ghandu aktar ħin għar-riċerka u l-qari.

Beda jirriċerka l-istorja ta’ familtu sa mill-1995 u s’issa għadu għaddej peress li jaħdem fuq storja tal-familja aktar milli dik tal-arblu tar-razza. Huwa jsemmi bosta dokumentazzjoni li għenuh jistabbilixxi l-għeruq tal-familja lura fis-snin. Bonanno jsemmi l-improtanza tal-istatus animarum u r-reġistri tal-magħmudijiet, żwiġijiet u mwiet.

X’inhuma l-istati liberi fl-arkivji tal-Kattidral fl-Imdina u dak tal-Kurja fil-Floriana? X’importanza kellu l-kunjom Duca fir-riċerka tiegħu? Kemm imur lura fis-snin? Tissemma wkoll il-kollezzjoni ta’ 700 volum ta’ ġeneoloġija ta’ Letard-Ciantar li tinsab fl-Arkivji Nazzjonali fir-Rabat.

Matul il-programm Eric Bonanno jitkellem dwar riċerka oħra li għamel, fosthom tagħrif dwar il-bandisti La Vittoria tal-Mellieħa meta dawn kienu marru Noto bosta snin ilu.