Mill-Arkivji : Programme 58 : Wayne Farrugia

Abstract

Is-Sur Wayne Farrugia huwa l-mistieden fil-programm ‘Mill-Arkivji’ tal-24 ta’ Marzu 2024. Wayne Farrugia, żgħażugħ li jħobb il-Malti, huwa il-promotur tal-litteriżmu bil-Malti fi ħdan l-Aġenzija Nazzjonali tal-Litteriżmu. Ħadem ukoll bħala librar u arkivista fil-librerija tal-Università ta’ Malta kif ukoll bħala għalliem tal-Malti.

Fl-2017 kiseb il-baċċellerat tal-Arti fil-Malti u fl-Istudji Soċjali u fl-2022 kiseb ukoll il-maġisteru fil-Malti. Ir-riċerka tiegħu kienet dwar il-kostruzzjoni tan-nazzjon fil-poeżija ta’ Oliver Friggieri li dwar dan ħa nitkellmu wkoll tul il-programm.

Wayne iħobb il-kanzunetti bil-Malti u kiteb il-lirika għal diversi kanzunetti. Ippubblika l-ewwel rumanz tiegħu bil-Malti, u ħareġ it-tieni edizzjoni tiegħu: ‘Mas-Sbieħ...id-Dlam’. Ħareġ ukoll ġabra ta’ novelli ‘L-Aħħar Petala u Novelli Oħrajn’ mal-Malta University Distributors.

Serva bħala Segretarju Internazzjonali mal-Għaqda Poeti Maltin, u preżentament, huwa wkoll membru fil-Bord Editorjali ta’ Muża Karkariża. Membru wkoll tal-Għaqda tal-Malti kif ukoll tal-Akkademja tal-Malti.

Wayne Farrugia ħa jkellimna fuq il-ħidma tiegħu meta kien fl-arkivju tal-Universita ta’ Malta u l-diversi kollezzjonijiet. Wayne jitkellem fit-tul dwar il-poeżija tal-Prof Oliver Friggieri b’relazzjoni għall-kostruzzjoni tan-Nazzjon. Għala Malta kienet f’xifer ta’ Gwerra Ċivili? Kif il-poeta iħares lejn il-qasma partiġjana tal-poplu Malti - intom u aħna? Kif jinħass il-polz ta’ Identita Nazzjonali fil-poeżija ta’ Oliver Friggieri?