Mill-Arkivji : Programme 61 : Liam Gauci u Michael Buhagiar

Abstract

FIl-programm ‘Mill-Arkivji’ tal-lum 14 ta’ April 2024 se nfakkru l-memorja tas-Sur Ġużeppi Muscat mir-Rabat li kellu għal qalbu l-aspett marittimu, inkluż ir-riċerka estensiva li għamel għal diversi pubblikazzjonijiet, barra s-sehem tiegħu fit-twaqqif tal-Mużew Marittimu. Jitkellmu fuq il-ħajja u l-ħidma ta’ Ġużeppi Muscat se jkollna lis-Sinjuri Liam Gauci u Michael Buhagiar li kienu jafuh sew, żewġ riċerkaturi li wkoll sabu l-għajnuna ta’ Muscat fl-istudji tagħhom. Liam Gauci kuwa kuratur anzjan fi ħdan Heritage Malta b’responsabbilta tal-Mużew Marittimu u Michael Buhagiar huwa arkivista fl-Arkivju Arċiveskovili fil-Floriana. Ġużeppi Muscat kien għalliem maħbub b’diversi passatempi. Kien mużiċista u wkoll passjoni kbira għal xogħol fl-injam. Kien ippinġi, inkluż l-ex voti. Kien membru tas-soċjeta M.U.S.E.U.M. u min jaf kemm għamel presepji u rranġa bambini. Il-passjoni artistika tiegħu kienu l-mudelli tax-xwieni li fihom kien ifittex kull dettal. Barra dan, Ġużeppi Muscat kien riċerkatur pereċċelenza f’dak kollox marbut mal-baħar u x-xwieni tal-Ordni ta’ San Ġwann. Ir-riċerka f’diversi arkivji fosthom il-Bibljoteka Nazzjonali u l-Arkivji Nazzjonali ssarfet f’bosta pubblikazzjonijiet interessanti kwotati minn akkademiċi internazzjonali f’dan is-settur.