Il-Lista tal-Griżma tal-Isqof tal-1556 f'Ħaż-Żebbuġ

Abstract

Fis-seklu sittax, il-Griżma tal-isqof ma kinitx appuntament annwali bħal ma nafuh illum, meta l-Isqof ta' kull sena jiġi fir-raħal tagħna u jamministra dan is-sagrament fil-knisja parrokkjali. Għall-kuntrarju, kienu jgħaddu s-snin - ġieli wkoll snin twal - bejn żjara u oħra, bil-konsegwenza li n-numru ta' dawk li jirċievu l-Griżma kien ikun ferm kbir u ta' etajiet differenti. Mal-ħatra tal-isqof Domenico Cubelles (1541-1566), is-sitwazzjoni nbidlet, billi minn hawn 'il quddiem, ħlief għal xi okkażjoniet fejn l-isqof kien ikun imsiefer jew fejn is-sede episkopali kienet tkun vakanti, l-isqof kien kontinwament residenti f'Malta. L-ewwel lista ta l-Griżma tal-lsqof li għandha l-parroċċa ta' Ħaż-Żebbuġ tmur lura għall-10 ta' Mejju 1556, jumejn qabel il-festa ta' San Filep, meta l-isqof Cubelles, waqt żjara fil-knisja parrokkjali ta' Ħaż-Żebbuġ, amministra l-Griżma lil 329 ruħ - 164 subien u 165 bniet.