Mill-Arkivji : Programme 68 : Mario Ellul

Abstract

Il-mistieden fil-programm ‘Mill-Arkivji’ tas-16 ta’ Ġunju 2024 huwa s-Sur Mario Ellul, edukatur u lettur li jispeċjalizza fuq l-istorja tat-tarzna navali. Mario Ellul twieled Bormla fl-1972, attwalment residenti fiż-Żejtun. Huwa gradwat fl-istorja u fl-2004 kiseb ukoll Masters fl-istorja. L-interessi prinċipali storiċi huma l-istorja moderna, il-ħakma Ingliża f’Malta u l-Imperu Ingliż, it-tarzna navali u r-Royal Navy, kif ukoll il-ħajja ta’ kuljum u l-kultura popolari f’Malta kolonja. Mario Ellul huwa involut fl-iscouting, u attwalment iservi bħala group scout leader ta’ wieħed mill-gruppi fl-Iscout Association ta’ Malta, li tagħha huwa wkoll l-arkivista. Ippubblika sensiela ta’ papers dwar it-tarzna u l-edukazzjoni tagħha, il-kultura popolari, u l-ħajja ta’ kuljum f’Malta kolonja. Kiteb ukoll dwar l-istorja tal-iscouting f’Malta. Huwa għalliem u huwa assistent kap fil-Kulleġġ De La Salle, u visiting lecturer fi ħdan l-Institute of Maltese Studies fl-Universita ta’ Malta. Miżżewweġ lil Maria u għandu tliet itfal – Kristina, Sophie u Amy. Is-Sur Ellul ħa jagħti deskrizzjoni twila dwar l-istorja tat-tarzna u l-importanza tagħha bħala bażi navali fil-Port il-Kbir f’nofs il-Mediterran. Bla dubju, it-tarzna kienet l-għajn ta’ ħafna xogħol għal ħafna familji li baqgħu obbligati lejn ir-Re u r-Reġina. Mario Ellul jistqarr li meta Malta kienet fil-Gwerra, it-tarzna kienet timpjega eluf ta’ ħaddiema. Wara ingħataw is-sensji. Liema kienu l-akbar strikes fit-tarzna? Jitkellem ukoll dwar il-klassiżmu li kien hemm fit-tarzna u d-differenza bejn ħaddiema Ingliżi fl-Ammirall u l-ħaddiema Maltin. Għala l-ħaddiema kien jeħtiġilhom jagħmlu l-għodda tagħhom stess? Kif kienet l-edukazzjoni tat-tarzna? X’wassal biex it-tarzna tinbiegħ lil C.H. Bailey fit-tmiem il-ħamsinijiet? X’impatt ħalliet it-tarzna fuq l-identita’ Maltija?