Mill-Arkivji : Programme 69 : Antida Mizzi

Abstract

Fil-programm ‘Mill-Arkivji' tal-lum 30 ta’ Ġunju 2024, se niltaqgħu mas-Sa Antida Mizzi li hija l-manager tal-kollezjonijiet speċjali u rari fil-librerija tal-Università ta’ Malta. Is-Sa Mizzi ħa tkellimna fuq il-bosta kollezzjonijiet interessanti, il-ġabriet u d-donazzjonijiet li l-librerija tal-Università tħaddan, fosthom il-kollezzjonijiet ta’ papers, kotba rari u dokumenti oħra. Antida Mizzi gradwat mill-Università ta’ Malta b'diploma fl-istudju tal-arkivji u l-immaniġjar tar-rekords fl-2011. Fl-2014 hija daħlet taħdem fil-librerija tal-Università ta’ Malta u kienet assenjata fl-arkivju tal-librerija. Hija għandha Masters fid-dokumentazjoni tal-wirt storiku u studju tal-Melitensia. Hija kisbet esperjenza fil-librerija tal-Università ta’ Edinburgh, u kif ukoll fl-Università ta’ Sussex. It-teżi li preżentat bħala parti minn dan l-istudju ħadet id-Dean's Award bħala l-aħjar teżi fil-livell ta’ Masters mill-Fakultà tal-Midja u x-Xjenzi tal-Għarfien għas-sena 2018. Il-librerija tal-kotba rari u l-arkivju bid-dokumenti u papers hija librerija speċjalizata. Insibu l-ġabriet tal-Avukat George Zammit, Dott. Giovanni Curmi, Ġużè Chetcuti, in-noti tar-riċerka li għamel il-Prof Godfrey Wettinger, il-kotba tal-Biblista, Pietru Pawl Saydon, u d-disinji u tpinġijiet ta’ Guido Lanfranco. Antida Mizzi titkellem dwar kif dawn waslu l-librerija. Ma’ dawn issemmi dak li ta l-Prof Oliver Friggieri, il-magazines interessanti li ġabar Ġużi Gatt, u il-papers ta’ Ġużè Cassar Pullicino. Interessanti wkoll il-kwantita ta’ karti bil-versi tal-kanzunetti li Albert M. Cassola kiteb, ħafna minhom għall-festivals tal-kant tas-snin sittin. Insemmu wkoll il-mużika u d-diski tal-Prof Charles Camilleri li wara mewtu l-armla s-Sa Doris Camilleri għoġobha tgħaddihom lil-librerija u l-arkivju tal-Università. Il-mużika tiegħu tinsab arkivjata u katalogata fl-Arkivju Nazzjonali. Bla dubju, Antida Mizzi tiffoka fuq il-wirt arkivistiku tal-Università: id-dokumentazzjoni tal-gradwati matul is-snin, il-laqgħat tas-senat, u l-ġabriet awdjo-viżiv bħal filmati u ritratti.