Mill-Arkivji : Programme 70 : Edgar Vella

Abstract

Il-mistieden tal-lum fil-programm’Mill-Arkivji’ tal-lum 7 ta’ Lulju 2024 huwa Mons Edgar Vella li se jkellimna dwar ir-riċerka li għamel fuq ir-relikwarji. Mons Edgar Vella twieled l-Imġarr fl-1961. Fl-1980 daħal is-Seminarju maġġuri u beda l-kors li jwasslu għal-Liċenznjat fit-Teoloġija. Huwa kien ordnat qassis fl-1988 u serva f’żewġ parroċċi qabel ġie fdat dmir ġdid. Filfatt fl-1993 ġie appuntat assistent kuratur fil-Mużew tal-Kattidral fl-Imdina fejn hemm kien involut fl-organiżazzjoni ta’ diversi wirjiet tematiċi fuq livel nazzjonali. Hu ġie maħtur Kuratur tal-istess Mużew fl-2005. Għal xi żmien, Mons Vella kien l-uffiċjal responsabbli mill-inventarju tal-oġġetti artistiċi u storiċi kkonservati fl-entitajiet ekklesjastiċi Maltin. Kien ukoll strumentali biex introduċa f’Malta il-presepju Naplitan b’diversi wirjiet kif ukoll bil-pubblikazzjoni ‘An Eighteenth Century Neapolitan Crib in Malta’, ippubblikat fl-2012. Mons Vella kien ukoll is-Segretarju għall-Kummissjoni tal-Patrimonju Kulturali Ekklesjastiku għall-Malta, responsabbli minn kull proġett ta’ restawr li jsir lokalment. Huwa gradwat mill-Universita ta’ Malta b’dottorat. Huwa l-awtur ta’ diversi papers xjentifiċi ppubblikati f’Malta u l-Italja, inkluż ukoll il-pubblikazzjoni tat-teżi tad-dottorat ‘Treasures of Faith’ fl-2016. Mons Edgar Vella huwa l-kollettur tal-arti u connoisseur. Dwar ir-riċerka tiegħu fuq ir-relikwi, relekwarji u korpi santi, Mons Vella jgħid li din kienet riċerka metikuluża mill-Inventaria u l-Visti Pastorali arkivjati fl-Arkivju Arċiveskovili tal-Kurja, u fl-Arkivju tal-Kattidral fl-Imdina. Huwa jsemmi b’enfasi r-riċerkali għamel mir-reġistri tal-Veneranda Lampada tal-parroċċi u r-reġistri tal-Conti tal-Fratellanzi.