Il-festa titulari ta’ San Filep ta’ Aġġira f’Ħaż-Żebbuġ fil-bidu tas-seklu 18 : ħarsa lejn l-attività mużikali u spejjeż oħra

Abstract

Waħda mill-karatteristiċi ewlenin tal-festi tagħna sew fil-funzjonijiet ta’ ġewwa kif ukoll fl-attività esterna hija l-element mużikali. Tul is-snin, il-prokuraturi tal-‘Veneranda Lampada’ ħasbu biex il-festa ta’ San Filep tkun iċċelebrata bl-aħjar mod. Parti kbira mill-ispiża tal-festi reliġjużi tas-seklu tmintax kienet għall-mużika waqt il-funzjonijet u l-purċissjonijiet; ħlas lil Maestro di Cappella u l-mużiċisti u l-kantanti li l-biċċa l-kbira minnhom kienu jkunu kjeriċi u għalhekk ġieli kienu magħrufa bħala l-orkestra tal-qassisin. Dawn kienu jinġiebu bil-kaless u jibqgħu għall-jiem tal-festa fir-raħal. Jekk wieħed imur lura għal ewwel snin tas-seklu tmintax, jinnota wkoll kemm in-nefqa għall-mużika fil-festa ta’ San Filep kienet diġà għolja. Din hija konfermata fir-reġistru tal-prokura ta’ Dun Mario Fenech u s-Sinjuri D. Mario Piscopo u Gio. Luca Pace, attivi bejn it-13 ta’ Ġunju 1706 u t-12 ta’ Jannar 1710.4