Il-knisja ta' Ġesu' Nazzarenu tax-Xagħra

Abstract

Il-knisja tan-Nazzarenu fix-Xagħra Għawdex għandha storja twila. L-ewwel kappella li nbniet fix-Xagħra (dejjem skont it-tradizzjoni) inbniet mill-ewwel patrijiet Agostinjani li ġew jgħammru Għawdex. Dawn ġew mill-Afrika ta' Fuq fis-sena AD. 439, wara l-persekuzzjoni tal-vandali, li kissru u ħarbtu fejn għammru żmien qabel ir-Rumani. Din ġiet ikkundannata u profanata minn Mons. Pietru Dusina fl-1575. In-naħa t'isfel tax-Xagħra ma kien hemm l-ebda knisja jew kappella għalhekk, l-aħħar Kappillan u l-ewwel Arċipriet tal-Kolleġġjata tax-Xagħra, Dun Ġużepp Diacono (1893-1909), mill-Belt Victoria, ra u ħass il-bżonn li tinbena knisja ġdida għall-ħtiġijiet tan-nies. Dan peress li kien hemm 'il bogħod biex in-nies imorru fil-knisja tal-Parroċċa tax-Xagħra. L-Arċipriet Diacono għamel il-pjanta tal-knisja, peress li kien iqis ruħu ta' perit. L-ewwel ġebla tal-knisja tan-Nazzarenu tpoġġiet fl-20 ta' Settembru fl-1903 mill-Isqof t'Għawdex, Mons Ġwann Marija Camilleri. Il-bennej kien Ġużepp Azzopardi tal-Bies mix-Xagħra. Mal-knisja nbena wkoll il-kunvent tas-Sorijiet Franġiskani tal-Qalb ta' Ġesu. Dawn is-sorijiet waqqafhom l-Arċipriet Diacono. L-ewwel Madre kienet Margerita Debrincat. Il-knisja tbierket fl-1909 mit-tieni Arċipriet tal-Kolleġġjata tax-Xagħra, Mons. Mawrizju Cauchi, li dam imexxi l-parroċċa tax-Xagħra għal 42 sena sħaħ, bejn 1-1909 u l-1951 sakemm miet fil-kariga. Il-prietka tal-okkażjoni saret mill-Kanoniku Franġisk Sultana. Il -knisja damet tinbena 5 snin.