Mill-Arkivji : Programme 72 : Joseph Debrincat

Abstract

Fil-programm’Mill-Arkivji’ tal-20 t’Ottubru se nisimgħu x’għandu xi jgħid Mro Joseph Debrincat minn Għawdex dwar ir-riċerka li għamel fl-arkivju mużikali tal-Matriċi speċjalment dwar il-mużika ta’ Francesco Azopardi, wieħed mill-aqwa kompożituri li kellha Malta fl-era tar-Rococo.

Min kien Francesco Azopardi? Kif kien dan il-vjaġġ ta’ riċerka fl-arkivju tal-Matriċi, dak ta’ Mons Gauci li jagħmel parti mill-arkivju tal-Matriċi, l-arkivju ta’ Mons Farrugia ‘tal-vers’, u arkivji oħra fosthom dak tal-Kattidral fl-Imdina?

Debrincat huwa magħruf ukoll li introduċa diversi kompożizzjonijiet ta’ Puccini lill-pubbliku Malti. Min hu għalieh Giacomo Puccini? X’hemm imħejji biex jitfakkar l-anniversarju tal-100 sena minn mewtu fl-29 ta’ Novembru li ġej?

Mro Debrincat jħaddan waħda mill-aktar kollezzjonijiet sinjuri tad-diski operistiċi u mużika serja fil-gżejjer Maltin. Min kien għalieh ix-xandar Emy Scicluna, riċerkatur tal-opra f’Malta? X’rabta ta’ ħbiberija kien hemm? Kif jissemma Dun Eddie Borg Olivier u Maria Callas?

Is-Surmast Joseph Debrincat minn Għawdex huwa gradwat fil-mużika mill-Universita ta’ Malta fejn hemm studja mal-Professuri Charles Camilleri u Joseph Vella. Id-direzzjoni studjaha mas-surmast Michael Laus u f’Milan ma’ Herbert Handt. Fl-2005 kiseb M.Phil. għat-teżi tiegħu fuq Francesco Azopardi. Fl-2001 Debrincat kien il-moħħ wara t-twaqqif tal-Fondazzjoni Classique – l-ewwel waħda tax-xorta tagħha f’Għawdex li matul dawn is-snin wassal diversi kunċerti ħafna minnhom bis-sehem tal-Orkestra Filarmonika ta’ Malta u wkoll is-sehem ta’ kantanti operistiċi internazzjonali, li għamluh l-iżgħar direttur Għawdxi li qatt imexxi l-Orkestra Nazzjonali ta’ Malta. Debrincat huwa l-Maestro di Cappella fil-Kattidral ta’ Għawdex u l-Knisja Parrokkjali ta’ Sannat fejn iwassal mużika antika arkivjata fl-arkivju tal-Matriċi. Huwa għalliem tal-mużika fl-Iskola tal-Mużika ta’ Għawdex li hija integrata fi ħdan l-Iskola tal-Arti Viżwali u tal-Ispettaklu ta’ Għawdex.