Meta twieled ezatt Mro. Willie Attard?

Abstract

Din hija sensiela ta’ kitbiet fuq ħajjet u ħidmet is-Surmast Willie Attard bħala mużiċist, għalliem, kompożitur, u surmast-direttur ta’ diversi baned Maltin u Għawdxin fosthom, is-Soċjetà Mużikali San Ġużepp tal-Ħamrun, li dam imexxieha għal madwar tletin sena sħaħ! Għaldaqstant, dis-sena qed nagħti bidu għal din is-sensiela ta’ kitbiet proprju f’għeluq il-45 anniversarju mill-mewt tiegħu li ġrat nhar it-3 ta’ Marzu 1970. Kulmin f’Marzu li għadda nzerta attenda għas-serata mużikali li saret ġewwa s-seda tas-Soċjetà seta’ jisma’ u japprezza wħud mill-aqwa xogħlijiet ta’ dan il-kompożitur fosthom, l-Innu Tifħir lil San Ġużepp. Kitbieti ser ikunu varji fil-kontenut tagħhom u li jinkludu tagħrif biografiku, storiku, analitiku, jew xort’ oħra li, fil-fehma tiegħi huma ta’ interess partikolari għal dawk il-qarrejja kollha li jridu jkunu jafu aktar affarijiet ġodda dwaru. Naturalment, proġett bħal mhu dan jieħu ż-żmien tiegħu biex tkun tista’ tinġabar l-informazzjoni kollha possibli fosthom, intervisti, ġbir jew self ta’ ritratti u dokumenti oħra, riċerka minn fuq kotba u ġurnali lokali ta’ żmienu. Parti interessanti oħra f’dal-proġett ser tkun tinkludi l-analiżi mużiko-storika ta’ xogħlijietu. Dan ser ikun qed nagħmlu bl-iktar mod ħafif safejn hu possibli bla ma nidħol f’dettalji żejda, speċjalment fejn jidħol kliem tekniku. Iżda fl-istess waqt, nixtieq ukoll li, dawn il-kitbiet tiegħi jservu għalbiex jedukaw lil dak li jkun bil-għan li jibda japprezza x-xogħlijiet sbieħ ta’ Mro. Willie Attard u fuq kollox, l-arti sabiħa tal-mużika.