Mro. Carmelo Doneo

Abstract

Il-ħsieb ewlieni ta’ dawn l-aċċenni mużikali f’din is-sensiela ta’ kitbiet biografiċi huwa li nlaqqagħkom mas-Surmastrijiet bravi li mexxew din l-ewwel Banda Ħamruniża. B’hekk, insiru nafu aktar mhux biss dwarhom, imma wkoll dwar il-ħidma tagħhom u x-xogħlijiet li ħallewlna fl-arkivju tagħna u oħrajn imxerrdin ma’ Malta u Għawdex. Uħud minn dawn il-kitbiet jistgħu ‘il quddiem jieħdu saħansitra l-forma ta’ analiżi ta’ xi xogħol mużikali partikolari li jkun inkiteb minn wieħed minn dawn is-Surmastrijiet. Bdejt biex qrajt dak kollu li ħallielna fil-kitbiet tiegħu l-istorjogarfu tas-Soċjetà tagħna, is-Sur Joseph Mifsud Matrenza – il-bniedem li kien jaf personalment tista’ tgħid lis-Surmastrajiet kollha minn Mro. Anton Miruzzi ‘l quddiem. Minn hemm imbagħad, nibtet il-kurżità, bħalma dejjem aktarx jiġrili, li nkompli niftaħ u/jew nibni fuq il-ftit li diġà nkiteb, bil-għan li l-istorja tas-Soċjetà tagħna tkun waħda kemm jista’ jkun komprensiva, speċjalment mil-lat mużikali. U biex nagħti bidu għal dawn il-kitbiet, għażilt li nibda b’Mro. Carmelo Doneo, mużiċist tas-Seklu Dsatax u l-ewwel Surmast-Direttur tal-Banda tagħna.